Fotografieren

Do Büdln suachn, des geht in d' stoana, do wiast koa findn, oba, wauns D' üba de büdln in da houmbeidsch mehra wissn wüst, daunn brauchst netta mit da maus auf des Büdl draufdrucka, üba des D' naegrich bist- host mi.
Olle Büdln ('s maeste san Dias) sand zerscht aegscennt und dann im JePEG-Format relativ hoch komprimiert (40/60/100/150) ogspaechat worn, und zwoa zwegn nan Spaechaplotz, dea imma zweng wiad. Aussadem - wer wü scho laung auf 's Lodna vo de Daten woatn?! - Zwegn denn kimmt a vur an jedn büdl des gleiche, oba a weng schlechta in da Qualität (~1/5 Auflösung), dafia plotzspoarada.

Zan Fotografian hob i mit ana Agfa-ISO-Rapid (24 x 24 mm) augfaungt, wiar i nu i' d' Hauptschui gaunga bi, speta daunn hob i mit der Kamera fotografiat, de wos mae Vota in de 37a-Joah vo saen eastn söwavadientn Göd gkafft hod - eh a scho ois a brauchte, des woa a BALDA COMPUR. Zerscht amoi hob i netta Schwoaz-Weiss-Füm gnumma, weu s' waet büllicha woan ois de Foabfüm, und an Gödschaessa hob i nia an ghobt.
Ois Obschluss vo maena Fochschuizaet hob i daunn mae erschte Spügireflexkamara gkriagt, a brauchte EXAKTA 1000, de wos i laeda neama hob. Speda daunn hob i ma a Minolta-XD5 und a Minolta-XD7 (S/W- und Dia-Fülm) zuaglegt mitsaumt a poa Objektiv' dazua (50mm 1:1,7 / 45mm 1:1,2 / 28mm 1:2,8 / 100~200mm 1:4,5 / Tele Converter 2x -5). A Zaetlaung hob i a in a  Dunkikaumma (S/W, Büdln vom Dia) gweaklt.
Saet Heabst 1975 moch i hauptsächli nuameah Dias, so dass mae Saummlung daweu schon ungefea 9500 Dias hot, obwoi i in letztn Heabst amoi gschaet ausgmist hob. Sämtliche Büdln san genau a so wia d' Büachin in Kompjuta gschpaechat, damit i s' find.
Haet nimm i, waunn i umanaundaziag , zwegn an laechtan hendling zmeist a soganaunnte "Gucki-Drucki", neimli a OLYMPUS AZ 230 und bein Dauchn de relativ bülliche NAUTICA BONSNAPP 400, de wos trotz aebautn Blitz gaunz guate Büdln mocht, und du kaunnst das immahin bis 45m Tiafm mitnehma, ohne dass s' osauft.